Seks perler

Kvifor arbeide med denne oppgåva?

Denne aktiviteten er enkel, men god, og kan få elevane til å utforske tal og plassverdisystemet. Aktiviteten legg til rette for gode samtalar om korleis ein kan notere funn, og oppfordrar til systematisk arbeid.

Oppgåva gir moglegheiter til å leggje vekt på problemløysing, resonnering og argumentasjon, tre av kjerneelementa i matematikk.

Mogleg tilnærming

Du kan begynne aktiviteten med å vise elevane eitt av eksempla med tre perler. Spør dei deretter om det finst andre måtar å arrangere perlene på, og sei dei nye tala høgt saman. Det kan vere greitt å ha ei enkel kuleramme på ei interaktiv tavle, slik at de kan flytte over perlene saman. Legg vekt på spørsmål som utfordrar elevane til å forklare korleis dei kan vere sikre på at vi har funne alle løysingane.

Etter ei slik innleiing kan elevane arbeide i par med å utforske problemet med seks perler. Ved å arbeide i par får dei moglegheit til å diskutere og prøve ut ideane sine. Det kan vere nyttig å ha eit variert utval av utstyr tilgjengeleg, men la elevane velje sjølve.

I ein klassesamtale kan elevane samanlikne ulike framgangsmåtar og ulike måtar å skrive ned resultata sine på. Diskuter fordelar med dei ulike framgangsmåtane. Kva for metodar fungerer best dersom vi skal vere sikre på at vi har alle moglegheitene? På dette tidspunktet kan elevane arbeide vidare med å finne alle moglege løysingar, og korleis dei kan vere sikre på at dei har funne alle. Det kan hende at nokre av elevane endrar dei skriftlege arbeida sine no.

Du kan også be elevar teikne inn nokre av løysingane sine på kulerammer. Deretter kan klassen saman undersøkje om dei har funne alle løysingane. Diskuter ulike måtar å vere systematisk på. Framhev at det ikkje finst éin rett måte å gjere det på, det vil vere ein styrke om elevane kan sjå fleire ulike systematiske framgangsmåtar.

Gode rettleiingsspørsmål

• Kva kan de fortelje meg om dei tala de har funne?
• Finst det fleire måtar å arrangere dei seks perlene på?
• Korleis kan de vere sikre på at de har alle løysingane?

Mogleg støtte

Somme elevar synest det er enklare å gå frå tre til fire perler, ikkje hoppe rett til seks. Å bruke konkretiseringsmateriell, slik som teljebrikker, er essensielt for dei som strevar med å forstå problemet. Elevane kan finne eigne løysingar som de kan samle. Samlinga med løysingar kan dei deretter organisere for å finne system.

Mogleg utviding

Ved å bruke fleire perler kan ein utvide oppgåva. Kor mange moglegheiter finst det med sju perler? Åtte? Finn dei nokon samanheng mellom dei ulike svara?

En annan måte å utvide oppgåva på er å ta med hundrarplassen. Kor mange moglegheiter finst det då?